Terug naar overzicht


Weg met det geld

Geplaatst op 10-03-2018
Geplaatst door titven

   

Heemkundekring Blariacum helt woensdaag 4 april un hièl interessante laezing met as ónderwerp:

Weg met det geld - Un muntvónds in zien historische context

Zörg det ge d’r beej ziet! Kóm luustere nao ein boeiend verhaol wie ein ‘vergaete’ rölke munte opniej geschiedenis schrief veur Venlo en Bliërick. Op ’t ind van de 15e ièuw weggegoeijd, in ’t begin van de 21e ièuw opniej weggegoeijd. Wies ’t oèteindelik toch in de juuste hand kwam . . .

In 2011 vóng detectorzeuker Wolf Alberts un rölke munte. ’t Woord gevónge in stortgrónd aafkomstig van ‘t opgravingsterrein beej ’t Fort. Naodet de munte ware schoèn gemak, bleek det ze vuuel alder waren as ’t Fort. De munte zien verborge erges in de eindfase van de strièd um de hièrschappie in ‘t hertogdóm Gelre in de jaore 1480-1481. Aanvullend historisch óngerzeuk in archieve bleek nuuedig um de historische context good in kaart te bringe. Daobeej kwame nieje gegaeves nao baove euver de belegering(e) van Venlo, en de daorbeej behurende ellende in Bliërick.

Spraeker Jos Benders is numismaat (muntkundige), en gespecialiseerd in de middelièuwse munten. Hae is redactieveurzitter van ’t Jaarboek voor Munt- en Penningkunde. Belangstellende en leeje zien van herte welkom. In Zalzershoaf, Zalzerskampwaeg 64, Hou-Bliërick, en ’t begint um 19.30 oor.