Gieris

Hoeve Gièris in d’n Bookend waas gelaege op de plek wao taegeswoordigs Kockersewaeg 20 is, op d’n hook van de kockersewaeg-Heymansstraot.

Toendertied woeënde in dees hoeve de óngehuwde Jozef Geurts, alias Gièris Joep (1863-1944), met zien óngehuwde tante Maria Geurts (1841-1927).

De ca. 80 jeurige Maria zit rechs in van de deuräöpening op de stool. In de deuräöpening zelf steit meugelik Angelina Geurts (1861-1947), zus van Joep.

Op d’n veurgrónd staon links (oet Zerum aafkòmstig) buurman Hendrik Kusters, alias Siese Driek (1846-1922) met zienen kleinzoon Lambert Kusters, alias Siese Baer (1916-1992, Jozef Geurts en rechs d’n andere buurman Martinus (Tinus) Slaats (1863-1929).

Naamgaever van dees hoeve is Gerard (Gièrit) Geurts, dae in 1735 in dit boerderieke ging woeëne. De hoeve is daonao 6 generaties lank bewoënd gewaes door dees femilie Geurts, met Gièris Joep as letste.

In 1935 verkóch Gièris Joep zien hoeve, nao 200 jaor bewoënd te zien gewaes door de femilie Geurts, aan Jozef Gubbels, alias Pauwe Sef, zoon van Pauwe Sjang, taeves d’n letsten eigenaer van dit pand.

Gièris Joep en Pauwe Sjang ware bije-imkers en meugelik haet dit met de verkoup van de hoeve ein rol gespeuld.

Jac Gubbels zaet: “miene pap (Pauwe Sef), kreeg d’n aliasnaam Giéris Joep toen hae in Gièris ging woeëne. In 1950 is de hoeve aafgebraoke en ginge ze verhoeze nao niejbouw, ‘n stökske wieërop de Kockersewaeg in. Ik kin ‘t mich neet herinnere, waas toen nog ‘nen baby”.

Fotograaf Klaas Uilkema, ca. 1921 (foto in kleur bewerk). Collectie Nationaal Archief.

Bron: Geschiedschrieving oet 't Book “Het gezicht van de Boekend”, met aanvullinge door Eric Ebus (2026)