Gerrit Hermans:
Gerrit Hermans (*Blerick 1928 - †Blerick 1991).
Wim Hermans vertelt:
“Ik weit neet of miene pap behalve in de Hoekstraot, urges anders haet gewoeënd, hae ging in idder geval nao de liegere schoeël in ut dörp, de latere Titus Brandsmaschoeël. Gerrit haet zelfs dezellufde meister gehad, as wao ik auk nog les van heb gehad, nl. meister Spee. Nao de liegere schoeël is hae nao de LTS gegaon en nao de LTS beej Leolux begónne as meubelstoffeerder. Ik weit neet wievuuël jaor, maar hae haet daornao auk gewerk beej Vroom & Dreesman. Beej Vroom deej hae vloerbedekkinge legge. Neet allein beej Vroom. Auk s'aoves nao ut aete ging hae met unne kollega beej verdeene, uiteraard met vloerbedekking legge. Det waas schienbaar nuuëdig, met 4 zeuns thoes. Beej Vroom haet hae zeker 25 jaor gewerk, want ik kin mich de receptie nog waal herinnere. D'n hiër Vroom zelf haet um nog toegesproake.
Beej Vroom haet hae gewerkt wiè hae aan zie hert woort geopereerd, un aope hert-operatie in Londen, det waas twieë waeke veur ós trouwe in 1980. Zoeë snel waas hae weer op de bein, det hae beej de broelof kós zien ! Ik weit neet miër of hae daornao nog gewerk haet. In 1991 is hae helaas met 62 jaor plotseling gestorve ónder ut sporte, hae speulde gaer volleybal.
Det is waat ik mich kan herinnere”.
Opmerking plaatsen